बिग बास लिग (बीबीएल) टी-ट्वान्टी क्रिकेट अन्तर्गत बिहीबार भएको खेलमा नेपाली लेग स्पिनर सन्दीप लामिछाने आवद्ध होबर्ट हुरिकेन्स विजयी भएको छ । आज भएको खेलमा होबर्टले सिड्नी थन्डर्सलाई ९ रनले पराजित गरेको हो ।

अष्ट्रेलियाको डकल्याण्ड स्टेडियम मेलबर्नमा टस जितेर पहिले ब्याटिङ गरेको होबर्टले निर्धारित २० ओभरमा ६ विकेट गुमाउदै १७७ रन बनाएको थियो । होबर्टका लागि कप्तान म्याथ्यू वेडले ८३ रनको अर्धशतकीय पारी खेले भने कावेल जेवेलले ५१ रन बनाए । त्यस्तै बेन म्याकडेरमोटले १८ रन जोडे । सिड्नीका लागि गुरिन्दर सान्धुले २ विकेट लिए भने ड्यानियल स्याम्स, तन्भिर सांघा र मोहम्मद हस्नैनको भागमा समान १-१ विकेट रह्यो ।

१७८ रनको लक्ष्य लिएर मैदान उत्रेको सिड्नीले निर्धारित २० ओभरमा ९ विकेट गुमाउदै १६८ रन मात्र बनाउन सक्यो । सिड्नीका लागि एलेक्स हेल्सले ३८ रन बनाए भने जेसन सांघाले ३१ रन जोडे । त्यस्तै नाथन म्याकएन्ड्रीयु ३० रन बनाई आउट भए भने ड्यानियल स्याम्सले १८ रन जोडे ।

होबर्टका लागि राइले मेरेडिथ र जोर्डन थोम्पसनले समान ३-३ विकेट लिए भने सन्दीप लामिछानेले २ विकेट लिए । ४ ओभर बलिङ्ग गरेका उनले २६ रन खर्चिएर २ विकेट लिएका थिए । जितसँगै होबर्ट १२ खेलमा २४ अंक जोड्दै तालिकाको चौथो स्थानमा छ भने समान खेलमा ३१ अंक जोडेको सिड्नी दोस्रो स्थानमा रहेको छ । खेलको म्यान अफ दि म्याच राइले मेरेडिथ भए ।