बिग बास लिग (बीबीएल) टी-ट्वान्टी क्रिकेट अन्तर्गत मंगलबार भएको खेलमा नेपाली लेग स्पिनर सन्दीप लामिछाने आवद्ध होबर्ट हुरिकेन्स विजयी भएको छ । हिजो भएको खेलमा होबर्टले मेलबर्न रेनेगेड्सलाई ६ रनले पराजित गरेको हो ।
अष्ट्रेलियाको डकल्याण्ड स्टेडियम मेलबर्नमा टस जितेर पहिले ब्याटिङ गरेको होबर्टले निर्धारित २० ओभरमा ५ विकेट गुमाउँदै १८२ रन बनाएको थियो । होबर्टका लागि कप्तान म्याथ्यु वेडले ४८ रन बनाए भने टिम डेभिड ४६ रनमा अविजित रहे । त्यस्तै डार्सी सर्टले ३७ रन बनाई आउट भए भने कालेब जेवेलले ३५ रन जोडे । रेनेगेड्सका लागि जोश लालोर र क्यामरुन ब्वाइसले समान २-२ विकेट लिए ।
१८३ रनको लक्ष्य लिएर मैदान उत्रेको रेनेगेड्सले निर्धारित २० ओभरमा ६ विकेट गुमाउँदै १७६ रन मात्र बनाउन सक्यो । रेनेगेड्सका लागि कप्तान आरोन फिन्चले ७५ रनको अर्धशतकीय पारी खेलेपनि टोलीलाई जित दिलाउन सकेनन् । त्यस्तै सर्न मार्शले ५१ रन बनाए बने जाम्स सेमोरले २४ रन जोडे । होबर्टका लागि टम रोजर्सले ३ विकेट लिए भने नेपाली लेग स्पिनर सन्दीप लामिछानेले २ विकेट लिए । ४ ओभर बलिङ्ग गरेका सन्दीपले २७ रन खर्चिए । जारी सिजनमा सन्दीपले १४ विकेट लिईसकेका छन् ।
जितसँगै होबर्ट १३ खेलमा २७ अंक जोड्दै तालिकाको पाँचौं स्थानमा छ भने समान खेलमा १६ अंक जोडेको रेनेगेड्स पुछारमा रहेको छ । खेलको म्यान अफ दि म्याच आरोन फिन्च भए ।
