कतारमा हुने फिफा विश्वकप-२०२२ छनोटमा अमेरिका विजयी भएको छ । बिहिबार बिहान भएको कोन्काफ छनोटको प्ले अफ अन्तर्गतको खेलमा अमेरिकाले होन्डुरसलाई ३-० ले पराजित गरेको हो ।

एकतर्फी बनेको खेलमा अमेरिकालाई विजयी गराउन वेस्टन म्याककेनी, वाल्कर जिमरम्यान र क्रिस्चियन पुलिसिचले समान १-१ गोल गरे । खेलको आठौँ मिनेटमा म्याककेनीले गोल गर्दै अमेरिकालाई अग्रता दिलाएका थिए । त्यस्तै खेलको ३७ औं मिनेटमा वाल्करले गोल गर्दै अमेरिकाको अग्रता दोब्बर बनाए । पहिलो हाफ २-० मा सकिएको खेलमा दोस्रो हाफमा अमेरिकाले थप एक गोल गर्यो ।

अमेरिकाको लागि खेलको ६८ औं मिनेटमा पुलिसिचले गोल गर्दै टोलीलाई ३-० को सहज जित दिलाए । जितसँगै अमेरिका ११ खेलमा २१ अंक जोड्दै अंक तालिकाको दोस्रो स्थानमा छ र उसको विश्वकपमा पुग्ने सम्भावना कायमै रहेको छ । यस्तै ३ अंक जोडेको होन्डुरस तालिकाको पुछारमा रहेको छ ।

त्यस्तै कतारमा हुने फिफा विश्वकप-२०२२ छनोटमा क्यानडा विजयी भएको छ । बिहीबार बिहान भएको कोन्काफ छनोटको प्ले अफ अन्तर्गतको खेलमा क्यानडाले एल साल्भाडोरलाई २-० ले पराजित गरेको हो । क्यानडाको लागि एटिबा हचिन्सन र जोनाथन डेभिडले समान १-१ गोल गरे ।

पहिलो हाफ गोलरहित बराबरीमा सकिएको खेलमा दोस्रो हाफमा क्यानाडाले २ गोल गरेको थियो । खेलको ६६ औं मिनेटमा हचिन्सनले गोल गरे भने खेलको इन्जुरी समयमा डेभिडले गोल गर्दै क्यानडालाई २-० को सहज जित दिलाए । जितसँगै क्यानडा ११ खेलमा २५ अंक जोड्दै तालिकाको शीर्ष स्थानमा रहँदै विश्वकपको नजिक पुगेको छ भने ९ अंक जोडेको एल साल्भाडोर छैटौं स्थानमा रहेको छ ।