इंग्लिस प्रिमियर लिग फुटबलमा म्यानचेस्टर सिटी विजयी हुँदा टोटेनहम भने पराजित भएको छ । बुधबार राति भएको खेलमा म्यानचेस्टर सिटीले ब्रेन्टफोर्डलाई २-० ले हराएको हो भने टोटेनहम साउथह्याम्पटनसँग ३-२ ले पराजित हुन पुग्यो ।

म्यानचेस्टर सिटीको घरेलु मैदानमा भएको एकतर्फी खेलमा सिटीको लागिरियाद महरेज र केभिन डी ब्रुएनले समान १-१ गोल गरे । खेलको ४० औं मिनेटमा महरेजले गोल गर्दै सिटीलाई अग्रता दिलाएका थिए । पहिलो हाफ १-० मा सकिएको खेलमा दोस्रो हाफको ६९ औं मिनेटमा ब्रुएनले गोल गर्दै सिटीलाई २-० को सहज जित दिलाए ।

जितसँगै सिटी २४ खेलमा ६० अंक सहित तालिकाको शीर्ष स्थानमा रहँदै दोस्रो स्थानको लिभरपुलमाथि १२ अंकको अग्रता बनाएको छ भने
२३ अंक जोडेको ब्रेन्टफोर्ड १४ औं स्थानमा रहेको छ । त्यसैगरी बुधबार रति नै भएको अर्को खेलमा टोटेनहमलाई साउथह्याम्पटनले ३-२ ले पराजित गरेको छ । टोटेनहमको घरेलु मैदानमा भएको निकै प्रतिस्पर्धात्मक बनेको खेलमा खेलको १८ औं मिनेटमा साउथह्याम्पटनका जान बेडनारेकले आत्मघाती गोल गर्दै टोटेनहमलाई अग्रता दिलाएका थिए । तर, खेलको २३ औं मिनेटमा साउथह्याम्पटनअर्मान्डो ब्रोजाले गोल गर्दै खेललाई बराबरीमा ल्याए ।

पहिलो हाफ १-१ को बराबरीमा सकिएको खेलमा दोस्रो हाफको ७० औं मिनेटमा सन ह्युङ मिनले गोल गर्दै टोटेनहमलाई २-१ को अग्रता दिलाए । तर खेलको ७९ औं मिनेटमा मोहमेदले गोल गर्दै साउथह्याम्पटनलाई २-२ को बराबरीमा ल्याए । त्यसपछि खेलको ८२ औं मिनेटमा चे एडम्सले गोल गर्दै साउथह्याम्पटनलाई ३-२ को जित दिलाए ।

जितसँगै साउथह्याम्पटन २३ खेलमा २८ अंक जोड्दै तालिकाको दशौ स्थानमा छ भने २१ खेलमा ३६ अंक जोडेको टोटेनहम सातौं स्थानमा रहेको छ । यसैगरी हिजै भएको अन्य खेलमा एस्टन भिल्ला र लिड्स युनाईटेडले ३-३ गोलको बराबरी खेल्दा नर्विच सिटी र क्रिस्टल प्यालेसले पनि १-१ को बराबरी खेलेका छन् ।