स्पेनिस ला लिगा फुटबलमा बार्सिलोनाले शानदार जित निकालेको छ । आइतबार राति भएको खेलमा बार्सिलोनाले एथ्लेटिक बिल्बाओलाई ४-० को फराकिलो अन्तरले पराजित गरेको हो ।

बार्सिलोनाको घरेलु मैदानमा भएको एकतर्फी खेलमा खेलको ३७ औं मिनेटमा पिएरे एमरिक अबमेयाङले गोल गर्दै बार्सिलोनालाई अग्रता दिलाएका थिए । पहिलो हाफ १-० मा सकिएको खेलमा दोस्रो हाफमा बार्सिलोनाले थप ३ गोल गर्यो । खेलको ७३ औं मिनेटमा ओसुमाने डेम्बेलेले गोल गर्दै बार्सिलोनाको अग्रता दोब्बर बनाए । त्यस्तै खेलको ९० औं मिनेटमा लुक डी योङको गोल मार्फत बार्सिलोना ३-० ले अघि रह्यो ।

त्यसपछि दोस्रो हाफको इन्जुरी समयमा मेम्फिस डीपेले गोल गर्दै बार्सिलोनालाई ४-० को सहज जित दिलाए । जितसँगै बार्सिलोना २५ खेलमा ४५ अंक जोड्दै लिगको चौंथो स्थानमा उक्लिएको छ भने ३७ अंक जोडेको एथ्लेटिक बिल्बाओ आठौं स्थानमा रहेको छ ।