इंग्लिस प्रिमियर लिग फुटबलमा टोटेनहमले फराकिलो जित दर्ता छ । सोमबार राति भएको खेलमा टोटेनहमले एभर्टनलाई ५-० को फराकिलो अन्तरले पराजित गरेको हो ।

टोटेनहमको घरेलु मैदानमा भएको एकतर्फी खेलमा खेलको १४ औं मिनेटमा एभर्टनका माइकल किनले आत्मघाती गोल गर्दै टोटेनहमलाई अग्रता दिलाएका थिए । त्यस्तै खेलको १७ औं मिनेटमा सन ह्युङ मिनले गोल गर्दै घरेलु टोलीको अग्रता दोब्बर बनाए । यस्तै खेलको ३७ औं मिनेटमा ह्यारी केनको गोल मार्फत टोटेनहम ३-० ले अघि रह्यो ।

पहिलो हाफ ३-० मा सकिएको खेलमा दोस्रो हाफमा टोटेनहमले थप २ गोल गर्यो । खेलको ४६औं मिनेटमा सेर्गी रेगुईलोनले गोल गर्दै टोटेनहमलाई ४-० को अग्रता दिलाए । त्यसपछि व्यक्तिगत दोस्रो गोल गर्ने क्रममा खेलको ५५ औं मिनेटमा केनले गोल गर्दै टोटेनहमलाई ५-० को शानदार जित दिलाए । जितसँगै टोटेनहम २६ खेलमा ४५ अंक जोड्दै सातौं स्थानमा छ भने २२ अंक जोडेको एभर्टन १७ औं स्थानमा रहेको छ ।