इंग्ल्यान्डविरुद्धको दोस्रो टी-२० मा दक्षिण अफ्रिका विजयी भएको छ । बिहीबार राति भएको खेलमा दक्षिण अफ्रिकाले घरेलु टोली इंग्ल्यान्डलाई ५८ रनले पराजित गरेको हो ।

कार्डिफको सोफिया गार्डेनमा भएको खेलमा टस हारेर पहिले ब्याटिङ गरेको दक्षिण अफ्रिकाले निर्धारित २० ओभरमा ३ विकेट गुमाउँदै २०७ रन बनाएको थियो । दक्षिण अफ्रिकाको लागि राईली रुसो तथा रिजा हेन्ड्रिक्सले अर्धशतकीय पारी खेल्दै क्रमश: ९६ र ५३ रन बनाए भने हेन्रिच क्लासेनले १९ रन जोडे । त्यस्तै क्विटन डि कक र ट्रिस्टान स्टुब्सले समान १५-१५ रन बनाए । इंग्ल्यान्डको लागि रिचार्ड ग्लिसन, मोईन अलि र क्रिस जोर्डनले समान १-१ विकेट लिए ।

२०८ रनको लक्ष्य लिएर मैदान उत्रेको इंग्ल्यान्ड १६ ओभर ४ बलमा अलआउट हुँदै १४९ रनमा समेटिएको थियो । इंग्ल्यान्डका लागि जोनी बेस्ट्रोले ३० रन बनाए भने जस बटलरले २९ रन जोड्दा मोईन अलिले २८ रन बनाउनु बाहेक अन्यको प्रदर्शन उल्लेखनिय रहेन । दक्षिण अफ्रिकाको लागि ताब्रेज साम्सी र एन्डीलेले समान ३-३ विकेट लिए भने लुङ्गी एनगीडीले २ विकेट लिँदा कागिसो रबडा र केशब महाराजको भागमा समान १-१ विकेट रह्यो । जितसँगै दक्षिण अफ्रिकाले तीन खेलको सिरिजमा १-१ को बराबरी गरेको छ । पहिलो टी-२० खेलमा इंग्ल्यान्डले दक्षिण अफ्रिकालाई ४१ रनले पराजित गरेको थियो । यी दुई टोलीबीचको तेस्रो तथा निर्णायक खेल आइतबार हुनेछ ।