न्युजिल्याण्डले वेस्ट इन्डिजविरुद्धको टी-२० सिरिज जितेको छ । शनिबार बिहान भएको खेलमा घरेलु टोली वेस्ट इन्डिजलाई ९० रनले पराजित गर्दै न्युजिल्याण्डले एक खेल अगाबै सिरिज जितेको हो । घरेलु टोली वेस्ट इन्डिजविरुद्धको तीन खेलको टी-२० सिरिज न्युजिल्याण्डले २-० ले आफ्नो पक्षमा पारेको हो ।

वेस्ट इन्डिजको सबिना पार्क किङ्गस्टन, जमैकामा भएको खेलमा टस जितेर पहिले ब्याटिङ गरेको न्युजिल्याण्डले निर्धारित २० ओभरमा ५ विकेट गुमाउँदै २१५ रन बनाएको थियो । उसका लागि ग्लेन फिलिप्सले ७६ रनको अर्धशतकीय परी खेले भने ड्यारियल मिचेलले ४८ रन जोडे । त्यस्तै डिभेन कन्वे ४२ रन बनाई आउट भए भने मार्टिन गुप्टिलले २० रन जोडे । वेस्ट इन्डिजको लागि ओबेड म्याकोईले ३ विकेट लिए भने रोमारियो शेर्फड र ओडन स्मिथको भागमा समान १-१ विकेट रह्यो ।

२१६ रनको लक्ष्य लिएर मैदान उत्रेको वेस्ट इन्डिजले निर्धारित २० ओभरमा ९ विकेट गुमाउँदै १२५ रन मात्र बनाउन सक्यो । उसका लागि ओबेड म्याकोई २३ रनमा अविजित रहँदा रोभमेन पावेलले २१ रन बनाए । यस्तै रोमारियो शेफर्डले १८ र सिमरन हिटमायरले १४ रन बनाउनु बाहेक अन्यको प्रदर्शन उल्लेखनीय रहेन । न्युजिल्याण्डका लागि मिचेल स्टानेर तथा मिचेल ब्राकवेलले समान ३-३ विकेट लिए भने टिम साउदी र ईश सोधीको भागमा समान १-१ विकेट रह्यो । यी दुई टोलीबीचको तेस्रो तथा अन्तिम टी-२० खेल आगामी सोमबार हुनेछ ।