नेदरल्याण्ड्सविरुद्धको पहिलो एकदिवसीय खेलमा पाकिस्तान विजयी भएको छ । मंगलबार भएको खेलमा पाकिस्तानले घरेलु टोली नेदरल्याण्ड्सलाई १६ रनले पराजित गरेको हो ।

नेदरल्याण्डको रोटरड्याममा भएको खेलमा टस जितेर पहिले ब्याटिङ गरेको पाहुना टोली पाकिस्तानले निर्धारित ५० ओभरमा ६ विकेट गुमाउँदै ३१४ रन बनाएको थियो । पाकिस्तानको लागि फकर जमानले १०९ रनको शतकीय पारी खेले कप्तान बाबर अजामले ७४ रनको अर्धशतकीय पारी खेले । त्यस्तै सादाव खान ४८ र आगा सलमान २७ रनमा अविजित रहे । नेदरल्याण्ड्सको लागि लोगान भान विक तथा बास डि लिडीले समान २-२ विकेट लिए भने भिभिएन किंग्माको भागमा १ विकेट रह्यो ।

३१५ रनको लक्ष्य लिएर मैदान उत्रेको नेदरल्याण्ड्सले निर्धारित ५० ओभरमा ८ विकेट गुमाउँदै २९८ रन मात्र बनाउन सक्यो । उसका लागि बिक्रमजित सिंह, स्कट एडवार्ड र टम कुपरले अर्धशतकीय पारी खेल्दै क्रमश: ६५, ६५ र ७१ रन बनाए । यस्तै लोगन भान बिक २८ रन बनाई आउट भए भने बास डि लिडीले १६ र टिजा मानुरुले १५ रन जोडे ।

पाकिस्तानको लागि हरिस रउफ तथा नसिम शाहले समान ३-३ विकेट लिए भने मोहम्मद नवाज तथा मोहम्मद वासिमको भागमा समान १-१ विकेट रह्यो । जितसँगै पाकिस्तानले तीन खेलको एकदिवसीय सिरिजमा १-० को अग्रता बनाएको छ । यी दुई टोलीबीचको दोस्रो एकदिवसीय खेल बिहिबार हुनेछ ।