स्पेनिस ला लिगा फुटबलमा रियल मड्रिडले लगातार दोस्रो जित हात पारेको छ । शनिबार राति भएको खेलमा रियल मड्रिडले सेल्टा भिगोलाई ४-१ को फराकिलो अन्तरले पराजित गर्दै नयाँ सिजनमा लगातार दोस्रो जित हात पारेको हो ।
रियल मड्रिडलाई शानदार जित दिलाउन करिम बेन्जिमा, लुका मोड्रिच, भिनिसियस जुनियर र फेडेरिको भाल्भर्डेले समान १-१ गोल गरे भने सेल्टा भिगोका इयागो आसपासले सान्त्वना गोल गरे । एकतर्फी बनेको खेलमा खेलको १४ औं मिनेटमा बेन्जिमाले पेनाल्टीमा गोल गर्दै रियल मड्रिडलाई अग्रता दिलाएका थिए । तर, खेलको २३ औं मिनेटमा सेल्टा भिगोका इयागोले गोल गर्दै खेललाई बराबरीमा ल्याए ।
त्यस्तै खेलको ४१ औं मिनेटमा मोड्रिचले गोल मार्फत पहिलो हाफमा रियल मड्रिड २-१ ले अघि रह्यो । यस्तै खेलको ५६ औं मिनेटमा जुनियरले गोल गर्दै रियल मड्रिडलाई ३-१ को अग्रता दिलाए । त्यसपछि खेलको ६६ औं मिनेटमा भाल्भर्डेले गोल गर्दै रियल मड्रिडलाई ४-१ को सहज जित दिलाए । त्यस अघि खेलको ८७ औं मिनेटमा रियलका इडेन हाजार्डले पेनाल्टीमा गोल गर्न सकेनन् । उनको प्रहार सेल्टा भिगो का गोलकिपरले रोकेका थिए । जितसँगै रियल मड्रिड २ खेलमा ६ अंक जोड्दै शीर्ष स्थानमा छ भने १ अंक जोडेको सेल्टा भिगो १४ औं स्थानमा रहेको छ ।
