अन्तर्राष्ट्रिय क्रिकेट परिषद् (आईसीसी) को टी-२० अलराउन्डरको नयाँ वरीयतामा दीपेन्द्र सिंह ऐरीले सुधार गरेका छन् । आईसीसीले बिहीबार सार्वजनिक गरेको नयाँ वरीयतामा दीपेन्द्रले एक स्थान सुधार गरेका हुन् ।

नयाँ वरीयतामा दीपेन्द्र ९ औं स्थानमा उक्लिएका छन् । यसअघि उनी १० औं स्थानमा रहेका थिए । त्यस्तै टी-२० ब्याटिङतर्फ कुशल भुर्तेल र दीपेन्द्र भने एक स्थान तल झरेका छन् । कुशल ५४ औं स्थानमा रहँदा दीपेन्द्र ५९ औं स्थानमा रहेका छन् ।

यस्तै टी–२० को बलिङतर्फको वरीयतामा सन्दीप लामिछाने ६४ औँ स्थानमा रहेका छन् । टी-२० ब्याटिङतर्फ पाकिस्तानका मोहमद रिजवान शीर्ष स्थानमा रहँदा बलिङमा अष्ट्रेलियाका जोस हाजलउड शीर्ष स्थानमा छन् भने अफगानिस्तानका मोहम्मद नाबी अलराउण्डरको शीर्ष स्थानमा रहेका छन् ।