अष्ट्रेलियामा जारी आठौं संस्करणको टी-२० विश्वकप क्रिकेटको उपाधिका लागि पाकिस्तान र इंग्ल्यान्ड भिड्दै छन् । आज (आइतबार) हुने खेल नेपाली समयअनुसार दिउँसो १:४५ बजे अष्ट्रेलियाको मेलबर्न क्रिकेट मैदानमा हुनेछ ।

पाकिस्तानले न्युजिल्याण्डलाई पराजित गर्दै फाइनल पुगेको हो भने इंग्ल्यान्डले भारतलाई हराउँदै उपाधि नजिक पुगेको हो । पाकिस्तान पहिलो खेलमा भारतसँग ४ विकेटले, दोस्रो खेलमा जिम्बावेसँग एक रनले पराजित हुँदा, तेस्रो खेलमा नेदरल्यान्ड्सलाई ६ विकेट तथा महत्वपूर्ण मानिएको चौथो खेलमा दक्षिण अफ्रिकालाई डीएल मेथड अनुसार ३३ रनले पराजित गरेको हो ।

यस्तै समूह चरणको अन्तिम खेलमा बंगलादेशलाई पाँच विकेटले हराउँदै पाकिस्तानले सेमिफाइनलमा स्थान बनाएको थियो । सेमिफाइनलमा पाकिस्तानले न्युजिल्याण्डलाई ७ विकेटले पराजित गरेको हो। यता इंग्ल्यान्डले भने पहिलो खेलमा अफगानिस्तानलाई ५ विकेटले, दोस्रो खेलमा आयरल्याण्डसँग डीएल मेथड अनुसार ५ रनले पराजित भएको थियो ।

त्यस्तै तेस्रो खेल वर्षाका कारण नभएपछि इंग्ल्यान्डले अष्ट्रेलियासँग अंक बाँडेको थियो भने चौथो खेलमा न्युजिल्यान्डलाई २० रनले पराजित गरेको इंग्ल्यान्डले समूह चरणको अन्तिम खेलमा श्रीलंकालाई ४ विकेटले हराएको थियो । सेमिफाइनलमा इंग्ल्यान्डले भारतलाई १० विकेटले पराजित गरेको थियो ।

हेड टु हेडमा अहिसेसम्म यी दुई टिमबिच कुल २८ खेल हुँदा इंग्ल्यान्ड १८ खेलमा जित निकाल्दा पाकिस्तानले ९ खेलमा जित हासिल गरेको छ भने एक खेलको नतिजा विहिन भएको छ । पाकिस्तानले पहिलो पटक २००९ मा टी-२० विश्वकपको उपाधि जितेको भने इंग्ल्यान्ड भने २०१० को विजेता हो । आजको विजेता टोलीले वेस्ट इन्डिजसँग बराबरी गर्ने छन् । टी-२० विश्वकप अहिलेसम्म वेस्ट इन्डिजले मात्र दुई पटक उपाधि जितेको छ ।