नवकान्तिपुर संवाददाता
काठमाडौं, २४ पुस ।
नेकपा (माओवादी केन्द्र)ले बृहत् वाम एकताका लागि ५ सदस्यीय कार्यदल गठन गरेको छ । शनिबार पार्टी कार्यालय पेरिस डाँडामा बसेको माओवादी केन्द्रको केन्द्रीय कार्यालयको बैठकले यस्तो निर्णय गरेको हो ।
बैठकले उपाध्यक्ष कृष्णबहादुर महराको संयोजकत्वमा कार्यदल गठन गरेको छ । बैठकले महासचिव देवप्रसाद गुरुङ, उपमहासचिवत्रय गिरिराजमणि पोखरेल, जनार्दन शर्मा र शक्तिबहादुर बस्नेत रहेको पाँच सदस्यीय कार्यदल गठन गरेको हो ।
बैठकले पार्टी अध्यक्ष पुष्पकमल दाहाल ‘प्रचण्ड’को नेतृत्वमा गठित सरकारका प्रधानमन्त्रीले यही पुस २६ गते प्रतिनिधिसभामा विश्वासको मत लिने कार्यतालिका रहेकाले त्यसका लागि प्रतिनिधिसभामा रहेका सबै दल तथा स्वतन्त्र सांसदलाई पार्टीका तर्फबाट आह्वान गर्ने निर्णय गरेको पार्टी उपाध्यक्ष एवं प्रवक्ता कृष्णबहादुर महराले जानकारी दिए ।
