प्रधानमन्त्री पुष्पकमल दाहाल ‘प्रचण्ड’ ले नेकपा (एकीकृत समाजवादी) का अध्यक्ष माधवकुमार नेपाल र जनता समाजवादी पार्टी (जसपा)नेपालला अध्यक्ष उपेन्द्र यादवसँग भेटघाट गरेका छन् । आज (आइतबार) बिहान माओवादी केन्द्रको संसदीय दलको कार्यालयमा उनीहरुबीच भेटघाट भएको हो ।

बैठक पछि सञ्चारकर्मीसँग संक्षिप्त कुराकानी गर्दै प्रधानमन्त्री एवं नेकपा माओवादी केन्द्रका अध्यक्ष प्रचण्डले आजको छलफल सकारात्मक रुपमा अघि बढेको बताए । भेटमा प्रधानमन्त्री प्रचण्डले एकीकृत समाजवादीलाई पनि सरकारमा सहभागी हुन अनुरोध गरेको उनको सचिवालयले जनाएको हो ।

त्यस्तै भेटमा प्रचण्डले दुबै अध्यक्षलाई आफूलाई संसदमा विश्वासको मत दिन आग्रह गरेका थिए । प्रधानमन्त्रीलाई विश्वासको मत दिने कुरामा नेपाल र यादव सकारात्मक देखिएको प्रचण्डको सचिवालयले जनाएको छ । जसपा अध्यक्ष यादवले पार्टी संसदीय दलको नेता चयनपछि सरकारमा सहभागिताका बारेमा निर्णय गरिने भन्दै विश्वासको मत दिनेमा कुनै शंका नरहेको बताए । प्रधानमन्त्री प्रचण्डले पुस २६ गते संसदमा विश्वासको मत लिँदैछन् ।