बालुवाटार बैठकमा पुरानै गठबन्धनलाई ब्यूँताउने विषयमा छलफल भएको छ । नेपाली कांग्रेस र माओवादी केन्द्रबीच भएको निर्णायक वार्तामा पुरानै गठबन्धन व्युँताएर नयाँ रणनीतिका साथ अगाडि बढ्ने विषयमा छलफल भएको हो ।

बैठकमा संविधानको रक्षाका लागि भए पनि पुरानै गठबन्धन आवश्यक रहेको भन्दै प्रधानमन्त्री प्रचण्ड नेतृत्वको सरकारलाई कायमै राखेर निर्वाचनअघि (मंसिर ४) को पुरानो गठबन्धन ब्यूँताउने विषयमा छलफल भएको बालुवाटार स्रोतले जानकारी दिएको छ। एमाले अध्यक्ष केपी शर्मा ओलीलाई एक्ल्याउनेसम्मको तयारी भइरहेको स्रोतको भनाइ छ।

बैठकमा एमाले अध्यक्ष ओलीको प्रतिगमनका कुरा कोट्याउँदै कांग्रेस नेताहरूले पाँच दलीय गठबन्धनलाई फेरि व्युँताउनुपर्ने धारणा राखेका थिए। ‘राष्ट्रपतिको निर्वाचनसँगै पुरानो गठबन्धनलाई कसरी ब्यूँताएर नयाँ रणनीतिका साथ अगाडि लैजान सकिन्छ भन्ने विषयमा छलफल भएको हो। यस विषयमा सबै नेताहरूले आ-आफ्नो राय राख्नुभएको थियो,’ बालुवाटार स्रोतले भन्यो ।

राष्ट्रपति भने नेपाली कांग्रेसलाई नै दिएर अगाडि बढ्ने विषयमा छलफल भएको थियो । कांग्रेस सभापति देउवाले राष्ट्रपतिमा एकीकृत समाजवादी र जनता समाजवादीको समेत समर्थन रहने दाबी गरेका थिए ।

पुरानो गठबन्धन व्युँताउनका लागि सरकार बाहिर रहेका नेकपा एकीकृत समाजवादी र जनता समाजवादी पनि सकारात्मक रहेको देउवाको दाबी थियो। ‘यस विषयमा माधवजी र उपेन्द्रजीसँग पनि छलफल भएको छ। यो अवसरलाई सदुपयोग गर्दै अगाडि बढ्नुपर्छ,’ देउवको भनाइ उद्धृत गर्दै स्रोतले भन्यो । पुरानो गठबन्धन ब्यूँताउँदा उपराष्ट्रपति जसपाले पाउने लगभग निश्चित रहेको स्रोतको भनाइ छ । यो समाचार अन्नपूर्ण पोस्टमा छ ।