देशका विभिन्न स्थानबाट मृत अवस्थामा ९ जना फेला परेका छन् । सुनसरी, देवानगन्ज गाउँपालिका-६ जिरोगवा बस्ने ३६ वर्षीया सुलेखा देवी यादव आफ्नै घरमा शनिबार मृत अवस्थामा फेला परेकी छिन् । प्रहरीले थप अनुसन्धानको लागि उनकै श्रीमानलाई नियन्त्रणमा लिएको छ ।

त्यस्तै सिन्धुली, सुनकोशी गाउँपालिका-१ आँपघारी बस्ने ७२ वर्षीया पदम माया नेपाल आफ्नै घरमा गएराति मृत अवस्थामा फेला परी छिन् । यता रोल्पा, सुनिल स्मृती गाउँपालिका-५ रिजास्थित लुङ्ग्री खोलामा सोही गाउँपालिका-७ लिवाङ बस्ने ६० वर्षीय खड्क बहादुर पुन मगर शनिबार मृत अवस्थामा फेला परेका छन् ।

यस्तै बागलुङ, जैमिनी नगरपालिका-१ सिरूबारी बस्ने २४ वर्षीय कमल नेपाली सोही ठाउँस्थित सिरूपाटा भन्ने स्थानमा आइतबार मृत अवस्थामा फेला परेका छन् । उता दाङ, तुलसीपुर उपमहानगरपालिका-२ भुवनेश्वरी टोल भम्के बस्ने ३५ वर्षीय तुलसीराम चौधरी सोही ठाउँस्थित कुलोको छेउमा आइतबार मृत अवस्थामा फेला परेका छन् ।

यसैगरी धनुषा, जनकपुर उपमहानगरपालिका-७ जानकीनगरस्थित कमलपोखरीको डिलमा हाल नाम, थर, नखुलेका अन्दाजी ३६ वर्षीय पुरूष शनिबार मृत अवस्थामा फेला परेका छन् । यस्तै चितवन, राप्ती नगरपालिका-४ डडुवा डेरा गरी बस्ने खैरहनी नगरपालिका-१० घर भएका ७५ वर्षीय केशर बहादुर प्याकुरेल आफ्नै कोठामा शुक्रबार मृत अवस्थामा फेला परेका छन् ।

त्यसैगरी बाँके, नेपालगंज उपमहानगरपालिका-२१ बिर्तागाउँ बस्ने २३ वर्षीया खुस्नुमा बानु सेख आफ्नै घरमा शुक्रबार मृत अवस्थामा फेला परेकी छिन् । यता कपिलवस्तु, शिवराज नगरपालिका-५ पूर्वरहटकोल सुकुमबासी बस्तीस्थित जही खोलामा सोही ठाउँ बस्ने ४४ वर्षीय शेर बहादुर पल्ली मगर शुक्रबार मृत अवस्थामा फेला परेका छन् । सबै घटनाका सम्बन्धमा प्रहरीले आवश्यक अनुसन्धान गरिरहेको छ ।