नवकान्तिपुर संवाददाता
काठमाडौं, १२ चैत ।
अछाममा ट्रयाक्टर दुर्घटना हुँदा पाँच जनाको मृत्यु भएको छ भने तीन जना घाइते भएका छन् । आज (सोमबार) षोडशाबाट साँफेबगरतर्फ आउँदै गरेको सु.प.प्र.०१००२ त ४९७९ नम्बरको ट्रयाक्टर अछामको मेल्लेख गाउँपालिकाको सुयडी नजिकै दुर्घटना भएको हो ।
दुर्घटनामा परी मृत्यु हुनेमा मेल्लेख–१ का ५५ वर्षीय रङ्ग धामी, १५ वर्षीय जनक धामी, ४५ वर्षीय प्रेम धामी, ३७ वर्षीय नरबहादुर धामी र २१ वर्षीय जनक धामी रहेका जिल्ला प्रहरी कार्यालयका सूचना अधिकारी प्रहरी निरीक्षक अर्जुन साउदले जानकारी दिए ।
दुर्घटनामा परी घाइते हुनेमा ४२ वर्षीय लालबहादुर धामी, ४० वर्षीय हंस धामी र १५ वर्षीय देवेन्द्र धामी रहेका छन् । मृतक र घाइते एउटै वडाका बासिन्दा हुन् । घाइते तीनैजनालाई उपचारका लागि बयलपाटा अस्पताल लगिएको प्रहरीले जनाएको छ ।
