भारतले आयोजक राष्ट्र पाकिस्तान भ्रमण गर्न अस्वीकार गरेपछि अन्तर्राष्ट्रिय क्रिकेट परिषद् (आइसिसी) ले अर्को वर्षको च्याम्पियन्स ट्रफीको अनिश्चितता समाधान गर्न वार्ता जारी रहेको बताएको छ ।

भारतले आठ टोली समावेश रहने प्रतियोगिताका लागि पाकिस्तान भ्रमण गर्न अस्वीकार गरेको आइसिसीले बताएपछि यस महिनाको सुरुदेखि प्रतियोगिता अनिश्चित अर्थात ‘सस्पेन्स’को अवस्थामा पुगेको छ ।

आणविक शक्ति सम्पन्न छिमेकी देशहरूले सन् १९४७ मा उपमहाद्वीपको विभाजनपछि तीनवटा युद्ध लडेका छन् र त्यो प्रतिद्वन्द्विता प्रायः क्रिकेट मैदानमा प्रतिबिम्बित हुन्छ ।

दुबईमा मुख्यालय रहेको आइसिसीको बैठक शुक्रबार छोटो समयका लागि भएको तर कुनै निर्णय बिना नै स्थगित गरिएको वार्ताको जानकारी राख्ने र मिडियासँग बोल्न अधिकृत नभएका स्रोतहरूले बताए ।

“सबै पक्षले सकारात्मक समाधानतर्फ काम गर्दै छन्”, एक स्रोतले भन्यो, “आगामी केही दिनमा पुनः बोर्ड बैठक बस्ने अपेक्षा गरिएको छ ।”

पाकिस्तान क्रिकेट बोर्डले यसअघि भारतलाई तटस्थ तेस्रो देशमा खेल्न अनुमति दिने प्रस्तावलाई अस्वीकार गरेको छ र फेब्रुअरी १९ देखि मार्च ९ सम्मको पूर्ण तालिका उनीहरूको मैदानमा सञ्चालन गर्नुपर्ने कुरामा जोड दिएको छ ।

शुक्रबारको छोटो बैठकपछि ‘पाकिस्तानी अडान उस्तै रहेको’ अर्को स्रोतले बतायो ।