नृत्य निर्देशक, कलाकार तथा मोडेल प्रमिला रिजाल अमेरिकामा भएको इन्टरनेशनल सोसाइटी फर द परफॉर्मिङ आर्टस् सम्मेलनमा सहभागी भएकी छन् । सम्मेलन अमेरिकाको न्युुयोर्क सिटीमा यही जनवरी १४ तारिखदेखि १६ तारिखसम्म आयोजना भएको थियो ।

इन्टरनेशनल सोसाइटी फर द परफॉर्मिङ आर्टस् अमेरिकाको निमन्त्रणामा ISPA सम्मेलनमा सहभागी हुन उनी त्यहाँ पुुगेकी हुुन् । रिजाल सहित ISPA सम्मेलनमा कला क्षेत्रका विभिन्न विधाहरूमा प्रतिनिधित्व गर्ने ५० भन्दा बढी विधाका ५०० भन्दा बढी विज्ञहरुको सहभागिता रहेको थियो ।

यस सम्मेलनको उद्देश्य नेतृत्वको विकास, विचारको आदान–प्रदान र संलग्न सदस्य संख्या बढाएर प्रदर्शित कलालाई बलियो बनाउँदै विश्वव्यापी रूपमा फैलाउनु हो ।

सम्मेलनमा रिजालले आयोजकलगाएत सहभागी प्रतिनिधिहरुलाई नेपाली कला तथा संस्कृतिका विषयमा विस्तृत जानकारी गराउँदै भविश्यमा नेपालमा पनि सरकारी वा गैरसरकारी निकायबाट यस्ता कार्यकमहरूको आयोजना गर्न सकिने जानकारी पनि दिइन् ।