स्वदेशी उद्योगमार्फत नेपाली अर्थतन्त्रमा निरन्तर योगदान दिँदै आएको रिजालको ग्रुप एण्ड कम्पनीले आफ्नो ३२ वर्षको सफल यात्रालाई स्मरण गर्दै डिलर भेटघाट कार्यक्रम भव्य रूपमा सम्पन्न गरेको छ । काठमाडौंस्थित होटल सोल्टीमा आयोजित कार्यक्रममा देशभरका डिलर, डिस्ट्रीब्युटर, व्यवसायिक साझेदार तथा कर्मचारीहरूको उल्लेखनीय सहभागिता रहेको थियो ।
कार्यक्रमको सभापतित्व रिजालको ग्रुपका अध्यक्ष तथा प्रबन्ध निर्देशक नबिन रिजालले गर्नुभएको थियो । कार्यक्रममा बोल्दै उनले कम्पनीको स्थापना यात्राबारे स्मरण गर्दै भने, करिब ३०–३२ वर्षअघि आत्मनिर्भर बन्ने दृढ इच्छासहित रोजगारीको खोजीमा काठमाडौं आए पनि आफ्नो सोच, क्षमता र आत्मसम्मानसँग मेल खाने अवसर नपाएपछि जन्मथलो विराटनगर फर्किनु नै आजको रिजालको ग्रुपको जग बनेको हो । विराटनगर फर्किएपछि “जागिर खोज्ने मात्र होइन, जागिर दिन सक्ने व्यक्ति बन्नुपर्छ” भन्ने सोचले आफूलाई प्रेरित गरेको र त्यही सोचबाट आजको रिजालको ग्रुप एण्ड कम्पनीको जन्म भएको उनले बताए ।
रिजालको ग्रुप नेपालमै अत्याधुनिक प्रविधिबाट फाइभ–लेयर पानी ट्यांकी उत्पादन गर्ने पहिलो कम्पनी बन्न सफल भएको छ । सुरुवाती चरणमा ग्राहकका गुनासो सुन्दै समाधान खोज्ने प्रयासले नै कम्पनीलाई नवप्रवर्तनतर्फ डो-याएको रिजालले उल्लेख गरे ।
पानी ट्यांकी उत्पादनबाट सुरु भएको कम्पनीले समयक्रमसँगै आफूलाई परिमार्जन गर्दै हाल पिभिसी, सिपिभिसी, एचडिपिइ पाइप तथा फिटिङ, गार्डेन पाइप, बोरिङ पाइपलगायतका उत्पादन गर्दै आएको र आगामी दिनमा स्टिल ट्यांकी उत्पादनसमेत सुरु गर्ने योजना रहेको जानकारी दिए ।
कार्यक्रममा बोल्दै उनले कर्मचारी, डिस्ट्रीब्युटर, उपभोक्ता तथा सम्पूर्ण टिमप्रति आभार व्यक्त गर्दै भने, “हाम्रो सफलताको श्रेय सबैसँग जोडिएको छ । कर्मचारीको मेहनत, विश्वास र सहयोग बिना यो उपलब्धि सम्भव हुने थिएन ।”
भविष्यमा कम्पनीलाई अझ व्यवस्थित, दिगो तथा नवीन प्रविधिमा आधारित बनाउने प्रतिबद्धता जनाउँदै उनले थपे, “हामी आगामी पुस्ता र नयाँ उद्यमीहरूलाई प्रेरित गर्ने दिशामा निरन्तर अगाडि बढ्नेछौं । देशको अर्थतन्त्र र व्यवसायिक वातावरण मजबुत बनाउन सबैको साझा प्रयास आवश्यक छ ।”
रिजालको ग्रुपको यो यात्रा केवल व्यावसायिक सफलता मात्र नभई देशप्रतिको समर्पण, युवाप्रतिको प्रेरणा र समाजप्रतिको योगदानको प्रतीक बनेको उनले बताए ।
कम्पनीको ब्राण्ड एम्बेस्डर अभिनेत्री स्वस्तिमा खड्का रहेको जानकारी पनि कार्यक्रममा दिइएको थियो ।
कार्यक्रमका क्रममा २०८१–८२ का उत्कृष्ट डिलरहरूलाई सम्मान गरिएको थियो । डिलरहरूले रिजालको ग्रुपलाई एउटा कम्पनी मात्र नभई परिवारको रूपमा व्याख्या गर्दै आगामी दिनमा सहकार्य अझ सुदृढ बनाउने प्रतिबद्धता व्यक्त गरे ।
