पत्रकार शालिकराम पुडासैनी आत्महत्या प्रकरणमा हिजो पक्राउ परेका न्युज २४ टेलिभिजनका कार्यक्रम प्रस्तोता रवि लामिछानेसहित तीनै जनालाई चितवन पुर्याइएको छ।
हिजो बिहीबार टेलिभिजन कार्यालयबाटै पक्राउ परेका लामिछानेसहित युवराज कँडेल र अस्मिता कार्कीलाई कडा सुरक्षाबीच मध्यराति नै चितवन जिल्ला प्रहरी कार्यालय पु-याइएको हो।
चितवन प्रहरीका अनुसार उनीहरूलाई आज चितवन जिल्ला अदालतमा पेस गरिनेछ ।
एसपी दानबहादुर मल्लले भने, “मोबाइलमा खिचिएको भिडियोको फरेन्सिक रिपोर्ट आएको छ। पोस्टमार्टम रिपोर्ट पनि आउँछ।”
रवि लामिछानेका कानुन व्यवसायी र परिवारका सदस्य पनि चितवन पुगेका छन्।
तीनै जनालाई जिल्ला प्रहरी कार्यालयको हिरासतमा अन्य थनुवालाई सरह राखिएको छ।
पत्रकार पुडासैनीलाई आत्महत्याका लागि दुरुत्साहन गरेको अभियोगमा प्रहरीले उनीहरूलाई पक्राउ गरेको हो।
