पाकिस्तानले श्रीलंकाविरुद्धको टेस्ट सिरिज जितेको छ । जारी दोस्रो टेस्टको पाँचौ दिन श्रीलंकाले ३.१ ओभर खेलेर कुनै रन नबनाई ४ विकेट गुमाएपछि पाकिस्तान २६३ रनले विजयी भएको हो ।
पाकिस्तानले पहिलो इनिंगमा १९१ रन बनाएको थियो भने दोस्रो इनिंगमा ३ विकेट गुमाएर ५५५ रन बनाउदै पारी घोषणा गरेको थियो । दोस्रो इनिंगमा पाकिस्तानका लागि चार खेलाडीले शतक बनाएका थिए । शान मसूद, अबिद अली, कप्तान अजहर अली र बाबर आजमले शतक बनाएका थिए ।
त्यस्तै श्रीलंकाले आफ्नो पहिलो इनिंगमा २७१ रन बनाएको थियो भने दोस्रो इनिंगमा २१२ रन बनाएर अल आउट भएको थियो । श्रीलंकाका लागि दोस्रो इनिंगमा ओशाड़ा फेर्नाँडोले १०२ रन बनाउदै शतकीय पारि खेलेपनि आफ्नो टिमलाई हारबाट बचाउन सकेनन् ।
यस अघि खेलेको टेस्ट बराबरीमा सकिएको थियो भने पाकिस्तानले टेस्ट सिरिज १-० ले जितेको छ ।
यस खेलमा पहिलो इनिन्ग्मा ३८ र दोस्रो इनिंगमा १७४ रन बनाएका पाकिस्तानका अबिद अली खेलको प्लेयर अफ द म्याच बनेका छन् भने सिरिजमा दुई शतक बनाउने अबिद अली प्लेयर अफ द सिरिज समेत बनेका छन् । उनले पहिलो टेस्टमा १०९ रन बनाएका थिए ।
पाकिस्तानले सन् २००६ पछि आफ्नो घरेलु मैदानमा पहिलो पटक टेस्ट सिरिज जितेको छ ।
