इङलिश प्रिमियर लिग अन्तर्गत गएराती भएको खेलमा पराजित भएपछि वेस्ट ह्यामले आफ्ना मुख्य प्रशिक्षक म्यानुयल पिलीग्रिनीलाई बर्खास्त गरेको छ ।
गएराती सम्पन्न खेलमा लिगको दोस्रो स्थानमा रहेको लेस्टर सिटीसँग वेस्ट ह्याम २–१ गोलअन्तरले पराजित भएको थियो ।
यस सिजनमा वेस्टह्यामको प्रदर्शन निकै खराब रहेको छ । वेस्ट ह्यामले पछिल्ला १२ खेलमध्ये नौ खेल हार बेहोरेको छ । अहिलेसम्म लिगमा १९ खेलमा ५ जित ४ बराबरी र १० खेलमा हार बेहोरेको वेस्ट ह्याम १९ अंकसहित १७औ स्थानमा रहेको छ ।
यस अघि रियल म्याड्रिड, म्यानचेस्टर सिटी जस्ता ठुला क्लबका समेत प्रशिक्षक बनिसकेका पिलिग्रिनी वेस्टह्याममा २०१८ मे २२ मा आएका थिए । उनको नेतृत्वमा वेस्ट ह्यामले कुल ६४ खेल खेल्यो भने २४ जित ११ बराबरी र २९ खेलमा हार बेहोरेको थियो ।
पिलीग्रिनीको बर्खास्ती पछि क्लबको नयाँ प्रशिक्षकको बारेमा भने क्लबले कुनै जानकारी दिएको छैन ।
