उत्तर कोरियामा कोरोना भाइरस लागेका एक जनालाई मृत्युदण्ड दिइएको खुलासा भएको छ । दक्षिण कोरियाको डोङ अ – इल्बो अखबारका अनुसार कोरोना भाइरस लागेका एक जनालाई उत्तर कोरियामा मृत्युदण्ड दिइएको हो ।

कोरोनाभाइरसबाट संक्रमित व्यक्तिले क्वारेन्टाइन नै नगरी सार्वजनिक स्नानगृह प्रवेश गरेको भन्दै मृत्युदण्ड दिइएको बुझिएको छ । ती मानिसलाई नियन्त्रणमा लिएर तत्कालै मृत्युदण्ड दिइएको जनाइएको छ । मृत्युदण्ड पाएका व्यक्ति चीन भ्रमणमा गएको र स्वदेश फर्केपछि उनलाई अलग्गै राखिएको थियो ।

उनी सरकारी अधिकारी रहेको समाचारमा उल्लेख छ । त्यस्तै, उत्तर कोरियामा नै अर्का सुरक्षा अधिकारीले आफू चीन भ्रमणमा गएको कुरा लुकाएको आरोपमा उनलाई गाउँ पठाइएको छ । उनी उत्तर कोरियाको शक्तिशाली राष्ट्रिय सुरक्षा निकायका अधिकारी हुन् । यसअघि उत्तर कोरियाले चीन भ्रमणबाट फर्केका जो कोहीलाई पनि ३० दिनसम्म क्वारेन्टाइनमा राख्ने घोषणा गरेको थियो ।

विश्व स्वास्थ्य संगठनले कोरोनाभाइरसबाट संक्रमित भएको आशंका गरिएका मानिसलाई केवल १४ दिन मात्र क्वारेन्टाइनमा राखे पुग्ने बताए पनि उत्तर कोरियाले महामारी फैलिन नदिन दोब्बर भन्दा बढी समय क्वारेन्टाइनमा राख्ने घोषणा गरेको हो ।

उत्तर कोरियाले यसअघि नै कोरोनाभाइरस रोकथामका लागि चीनसँगको नाका ठप्प पारिसकेको छ ।