अमेरिकी राष्ट्रपति डोनाल्ड ट्रम्प अहिले भारतको औपचारिक भ्रमणका क्रममा छन् । विश्वकै शक्तिशाली राष्ट्रप्रमुख आउँदा भारतीय प्रधानमन्त्री नरेन्द्र मोदी उनलाई स्वागत गर्न विमानस्थल नै पुगे ।
भ्रमणका क्रममा ट्रम्प पत्नी एवं प्रथम महिला मेलानिया ट्रम्प पनि उनको साथमा छन् । तर विमानबाट उत्रिएलगत्तै ट्रम्प, मोदी र मिलानियासँगै देखिएकी एक युवती चर्चामा छिन् । उनी को हुन् र यति नजिक उनी कसरी जान पाइन भन्ने प्रश्न उब्जिएको छ । यिनको नाम गुरदीप कौर चावला हो । उनी प्रधानमन्त्री मोदीका अनुवादक हुन् । उनी अमेरिकन ट्रान्सलेटर एशोसियसनको सदस्य पनि छिन् ।
जबजब विदेश भ्रमणका क्रममा प्रधानमन्त्री मोदीले हिन्दीमा भाषण गर्छन् तब उनले त्यसलाई अंग्रेजीमा अनुवाद गर्छिन् । यतिमात्रै होइन गुरदीप चावला प्रधानमन्त्री मोदीका साथ भारतमा पनि विदेशी नेताहरुसँगको भेटवार्ताका क्रममा सँगै देखिन्छिन् । प्रधानमन्त्री मोदीले हिन्दीमा भाषण दिएपछि उनी त्यसलाई अग्रेजीमा अनुवाद गरेर प्रस्तुत गर्छिन् ।
सन् १९९० मा गुरदीपले भारतीय संसदबाट आफ्नो करियर सुरुवात गरेपनि केही समयपछि उनी श्रीमान्सँग अमेरिका सिफ्ट भइन् । सन् २०१० मा अमेरिकाका पूर्व राष्ट्रपतिसँग उनको अनुवादकका रुपमा गुरदीप भारत आइन् ।
त्यसपछि उनी मोदीको अनुवादकका रुपमा जोडिएकी हुन् । गुरदीपलाई अन्य थुप्रै भाषको समेत ज्ञान रहेको अन्तर्राष्ट्रिय संचारमाध्यमले जनाएका छन् ।
