राष्ट्रिय जनता पार्टी (राजपा) का सांसद लक्ष्मणलाल कर्णले कोरोना भाइरस भयानक रोग नभएको बताएका छन् । प्रतिनिधीसभाको शुक्रबार बसेको बैठकमा बोल्दै सांसद कर्णले सञ्चारमाध्यहरुले कोरोना भाइरसका बारे बढी नै प्रचार गरेको भए पनि यो त्यति भयानक रोग नभएको बताएका हुन् ।

सांसद कर्णले कोरोना भाइरसको संक्रमणबाट जोगिन सरकारले आफ्नो तयारी के गरिरहेको छ त्यसका बारेमा ससंदमार्फत जनतालाई जानकारी दिनु पर्ने बताए ।

कोरोना भाइरसको मृत्युदर कम रहेको बताउँदै सांसद कर्णले भने ‘अहिले मानिसहरू जति त्रसित भए पनि त्यति त्रसित हुनुपर्ने अवस्था छैन । तर सर्तकता त हामीले रात दिन राख्नै पर्छ र यो रोग त्यति भयानक होइन भन्ने प्रचार पनि हामीले गर्नु पर्छ ।’ उनले अगाडि थपे ‘सोसल मिडियामा कसैले रक्सी खाए ठीक हुन्छ भन्छ । कसैले प्याज खाए ठिक हुन्छ भन्छ भने कसैले लसुन खाए ठीक हुन्छ भन्छ । मन्त्रीजी के खाए ठिक हुन्छ ? तपाईले नै बताइदिए सारा सोसल मिडाया समाप्त हुन्छन् ।’

कोरोना भाइरसबाट बच्न स्वास्थ्य मन्त्री मात्र नभएर सम्पूर्ण नेपाली जनता सबै राजनीतिक दल र सरकार एकताबद्ध भएर लाग्नु पर्ने र यसबाट कोही पनि त्रसित बन्न नहुने सांसद कर्णको भनाई थियो ।