भारतको पटनामा एक नेपालीमा कोरोना भाइरसको संक्रमण पुष्टि भएको समाचारको अस्पतालले खण्डन गरेको छ । कोरोनाको आशंकामा एक नेपाली पटना मेडिकल कलेज, बिहारमा भर्ना भएका छन् । तर उनलाई कोरोना संक्रमण भएको पुष्टि भइनसकेको पटना मेडिकल कलेज, बिहारका प्रिन्सिपल प्रा. डा. विद्यापति चौधरीले जानकारी दिए ।
‘उनको उपचार जारी छ, केही रिपोर्ट आउन बाँकी नै छ’, चौधरीले भने, ‘हामीले उनको रिपोर्ट नेशनल इस्टिच्यूट अफ मेडिकल साइन्स, पुनेमा पठाएका छौं ।’ वीरगञ्जका उनी केही दिनअघि अस्पतालमा भर्ना भएका थिए ।
उनको विस्तृत रिपोर्ट आउन दुई(तीन दिन लाग्ने उनले बताए । उनले थपे, ‘त्यसपछि मात्रै विस्तृतमा भन्न सकिन्छ ।’ भारतीय टेलिभिजन च्यानलहरुले उनलाई कोरोना संक्रमण भएको पुष्टि भएको दाबी गरेका छन् ।
यता वीरगञ्ज महानगरले आकस्मिक बैठक बोलाएको छ । एकजनामा कोरोना संक्रमण पुष्टि भएसँगै परिवार र ती व्यक्तिको सम्पर्कमा आएका सबैलाई क्वारेन्टाइनमा राख्ने र कोरोनाबारे अन्य आवश्यक निर्णय लिन बैठक बोलाइएको बताइएकाे छ।
