कोरोना भाइरसका कारण भारतमा मृत्यु हुनेको संख्या ९ पुगेको छ । नेपालसँग सीमा जोडिएको पश्चिम बंगाल राज्यको कोल्काता शहरमा सोमबार एक जनाको मृत्यु भएसँगै भारतमा मृतकको संख्या बढेको हो । कोल्कातामा कोरोना भाइरसका कारण मृत्यु हुने स्थानीय रेल्वेका कर्मचारी रहेको जनाइएको छ ।

५५ वर्षे ती व्यक्तिले हालै कुनै पनि विदेश भ्रमण नगरेकाले उनी स्थानीय क्षेत्रमै संक्रमित भएको स्वास्थ्य अधिकारीले जनाएका छन् । यस्तै, सोमबार नै मुम्बई शहरमा अर्का एक जनाको मृत्यु भएको थियो । मुम्बईमा मृत्यु हुने व्यक्ति फिलिपिन्सबाट मुम्बई आएको भारतीय सञ्चारमाध्यमले जनाएका छन् । मृतक यसअघि दम र चिनीरोगबाट पीडित थिए ।

कोरोना भाइरसका कारण सोमबारसम्म मुम्बई शहरमा मात्र तीन जनाको मृत्यु भइसकेको छ । हालसम्म भारतमा ४ सय १५ जनामा कोरोना भाइरसको संक्रमण पुष्टि भइसकेको छ । आइतबारमात्र नेपालसँग सीमा जोडिएको भारतको बिहार राज्यमा पनि एक व्यक्तिको मृत्यु भएको थियो ।