भारत पश्चिम बंगालको सिलिगुडीस्थित नर्थ बंगाल मेडिकल कलेजमा भर्ना भएकी एक जना नेपाली भाषी महिलाको सोमबार बिहान उपचारका क्रममा मृत्यु भएको छ।
उनी कालिम्पोङ निवासी हुन् । ४४ बर्षिया ती महिला केही समय अघि भारतको चेन्नइ गएकी र फर्केर आए लगत्तै कोरोना भाइरस संक्रमणका लक्षणहरु देखा परेपछि नर्थ बंगाल मेडिकल कलेजमा भर्ना भएकी थिइन् ।
गत शनिवार प्राप्त उनको रिपोर्टमा कोरोना भाइरस संक्रमण भएको उल्लेख गरिएको थियो । उनी गत मार्च ७ तारिक चेन्नइ गएर मार्च १९ तारिक कालिम्पोङ फर्किएकी थिइन् । ती महिलाको मृत्यु भएपछि उनको उपचारमा संलग्न चिकित्सक तथा स्वास्थ्यकर्मीलाई आइसोलेसनमा राख्ने प्रयास भइरहेको भारतीय सञ्चार माध्यम द हिन्दुले जनाएको छ।
पूर्वी नेपालको सीमासंग जोडिएको पश्चिम बंगालमा कोरोना भाइरस संक्रमणबाट मृत्यु हुनेको संख्या दुई पुगेको छ । यस अघि कोलकातामा ५७ बर्षिया पुरुषको मृत्यु भएको थियो ।
