प्रहरीले एकाबिहानै लकडाउन उल्लङ्घन गर्ने २ हजार बढीलाई पक्राउ गरेको छ । आज बिहान ८ बजेसम्ममा काठमाडौं उपत्यकाका विभिन्न स्थानबाट २ हजार ३८ जनालाई पक्राउ गरेको प्रहरीले जनाएको छ । पक्राउ पर्नेमा १ हजार ५६३ जना पुरुष र ४७५ जना महिला रहेको प्रहरीले जनाएको छ । यस्तै लकडाउन उल्लङ्घन गर्दै चलाइएका २ सय ५३ सवारी साधनलाई प्रहरीले नियन्त्रणमा लिएको छ ।

ट्राफिक प्रहरीले यी गाडी अत्यावश्यक बाहेकमा कामका लागि चलाएको पाइए दिनभरि होल्ड गरेर बेलुकीमात्रै फिर्ता गर्ने गरेको छ । कोरोना भाइरसको सम्भावित जोखिमलाई मध्यनजर गर्दै प्रहरीले अत्यावश्यक काम बाहेक घर बाहिर ननिस्किन र सुरक्षा सतर्कता अपनाउन आग्रह गर्दै आएको छ ।

कोरोना भाइरसको सम्भावित जोखिम रोक्न सरकारले लागू गरेको लकडाउनको आज २३ दिन पुगेको छ । नेपालमा कोरोना भाइरसबाट संक्रमितको संख्या १६ पुगेको छ । संक्रमितको संख्या बढ्न थालेपछि सरकारले मंगलबार मात्रै वैशाख १५ गतेसम्मका लागि लकडाउन थप्ने निर्णय गरेको थियो । सरकारले लकडाउन थपेको दोस्रो दिनमै सबैभन्दा बढी उल्लंघन भएको पाइएको छ ।