ब्राजिलमा कोरोना भाइरसको संक्रमणका कारण एक दिनमै मृत्यु हुनेको संख्या नयाँ उचाईमा पुगेका छ।
कोभिड–१९ का कारण ब्राजिलमा पछिल्लो २४ घण्टामा ११ सय ७९ जनाको ज्यान गएको छ । यसअघि मे १४ मा ८३५ जनाको ज्यान गएको थियो । ब्राजिलमा हालसम्म कोभिड–१९ बाट १७ हजार ९८३ जनाको ज्यान गएको छ ।
मंगलबार ब्राजिलमा १७ हजार ४०८ जना नयाँ संक्रमित थपिएपछि त्यहाँ कुल संक्रमितको संख्या दुई लाख ७१ हजार ८ सय भन्दा बढी पुगेको छ । ब्राजिलमा कोरोना भाइरस महामारीको उच्च तह जुनमा पुग्ने अनुमान छ ।
कोरोना भाइरसविरुद्धको अभियानका सम्बन्धमा ब्राजिल स्पष्ट रुपमा विभाजित छ । राष्ट्रपति जायर बोल्सोनारोले अहिलेसम्म पनि कोरोना भाइरसलाई गम्भीर रुपमा लिएका छैनन् ।
उनले लकडाउनसहितका उपायहरु लागु गर्न नपर्ने बताउँदै आएका छन् । उनकै सरकारका मन्त्री तथा उच्च अधिकारीहरु बोल्सोनारोको अवधारणामा सहमत छैनन् ।
