घरेलु टोली नेपाल छैटौं संस्करणको महिला साफ च्याम्पियनसिप फुटबलको फाइनलमा प्रवेश गरेको छ । शुक्रबार भएको खेलमा सविज विजेता भारतमाथि १-० को ऐतिहासिक जित निकाल्दै नेपाल फाइनलमा प्रवेश गरेको हो ।

नेपालको घरेलु मैदान दशरथ रंगशालामा भएको खेलमा नेपालको लागि रश्मी कुमारी घिसिङले निर्णायक गोल गरिन् । निकै प्रतिस्पर्धात्मक बनेको खेलमा पहिलो हाफको इन्जुरी समयमा प्रिती राईको पासमा रश्मीले गोल गर्दै नेपाललाई अग्रता दिलाएकी थिइन् । पहिलो हाफ १-० मा सकिएको खेलमा दोस्रो हाफमा दुवै टोलीबाट गोल नहुँदा नेपाल १-० को जित निकाल्दै उपाधि नजिक पुगेको हो ।

यसअघि महिला साफमा भारतलाई पराजित गर्न नसकेको नेपालको लागि यो पहिलो ऐतिहासिक जित हो । अब उपाधिको लागि नेपालले बंगलादेशको सामना गर्नेछ । शुक्रबार भएको पहिलो सेमिफाइनलमा भुटानलाई ८-० को फराकिलो अन्तरले पराजित गर्दै बंगलादेश फाइनलमा प्रवेश गरेको थियो । फाइनल खेल आगामी सोमबार हुनेछ ।