इंग्लिस प्रिमियर लिग फुटबलमा टोटेनहम विजयी भएको छ । बुधबार राति भएको खेलमा टोटेनहमले क्रिस्टल प्यालेसलाई ४-० ले पराजित गरेको हो ।

पहिलो हाफ गोलरहित बराबरीमा सकिएको खेलमा दोस्रो हाफमा टोटेनहमले उत्कृष्ट पुनरागमन गर्दै चार गोल गरेको थियो । खेलको ४८ औं मिनेटमा ह्यारी केनले गोल गर्दै टोटेनहमलाई अग्रता दिलाएका थिए । त्यस्तै व्यक्तिगत दोस्रो गोल गर्ने क्रममा खेलको ५३ औं मिनेटमा केनले गोल गर्दै टोलीको अग्रता दोब्बर बनाए ।

यस्तै खेलको ६८ औं मिनेटमा माट दोहर्टिको गोलबाट टोटेनहमको ३-० ले अघि रह्यो । त्यसपछि खेलको ७२ औं मिनेटमा सन ह्युङ मिनले गोल गर्दै टोटेनहमलाई ४-० को सानदार जित दिलाए । जितसँगै टोटेनहम ३३ अंक जोड्दै तालिकाको पाँचौं स्थानमा छ भने २२ अंक जोडेको क्रिस्टल प्यालेस १२ औं स्थानमा रहेको छ ।

त्यसैगरी प्रिमियर लिग अन्तर्गत नै बुधबार राति भएको अन्य खेलमा नटिङघम फरेस्टले साउथह्याम्पटनलाई १-० ले पराजित गर्दा लिड्स युनाईटेड र वेस्ट ह्यामले २-२ गोलको बराबरी खेलेका छन् भने उल्भ्स र एस्टन भिल्लाले पनि १-१ गोलको बराबरी खेलेका छन् ।