भारतमा जारी १४औँ संस्करणको पुरुष साफ च्याम्पियनसिप फुटबल प्रतियोगिताअन्तर्गत समूह चरणको आफ्नो अन्तिम खेलमा नेपाल विजयी हुँदै सान्त्वना जित निकालेको छ । मंगलबार भएको खेलमा नेपालले पाकिस्तानलाई १-० ले पराजित गरेको हो ।

भारतको बैङ्गलोरस्थित कान्तिराव स्टेडियममा भएको खेलमा नेपाललाई जित दिलाउन आशिष चौधरीले निर्णायक गोल गरे । निकै प्रतिस्पर्धात्मक बनेको पहिलो हाफ गोलरहित बराबरीमा सकिएको थियो । तर दोस्रो हाफको ८०औँ मिनेटमा आशिषले गरेको एक गोल नै नेपाललाई जित दिलाउन पर्याप्त रह्यो ।

नेपालको यो पहिलो जित हो । यसअघि नेपालले कुवेतसँग ३-१ र घरेलु टोली भारतसँग २-० को पराजय ब्यहोरेको थियो । नेपालले तीन खेलमा ३ अङ्क जोड्दै प्रतियोगिता टुङ्ग्याएको छ भने तीनै खेलमा पराजित पाकिस्तान अंकविहिन बन्यो ।