इन्डियन प्रिमियर लिग (आईपीएल) टी-ट्वान्टी क्रिकेटमा गुजरात टाइटन्स विजयी भएको छ । बिहीबार राति भएको खेलमा गुजरातले राजस्थान रोयल्सलाई ३७ रनले पराजित गरेको हो । जितसँगै गुजरात शीर्ष स्थानमा उक्लिएको छ ।

मुम्बईमा टस हारेर पहिले ब्याटिङ गरेको गुजरातले निर्धारित २० ओभरमा ४ विकेट गुमाउदै १९२ रन बनाएको थियो । गुजरातका लागि कप्तान हार्दिक पाण्डयाले अविजित रहँदै ८७ रनको अर्धशतकीय पारी खेले भने अभिनव मनोहरले ४३ रन बनाए । राजस्थानका लागि कुलदिप सेन, युजभेन्द्र चाहल र रियान परागले समान १-१ विकेट लिए ।

१९३ रनको लक्ष्य लिएर मैदान उत्रेको राजस्थानले निर्धारित २० ओभरमा ९ विकेट गुमाउदै १५५ रन मात्र बनायो । राजस्थानका लागि जोश बट्लरले ५४ रनको अर्धशतकीय पारी खेले पनि टोलीलाई जित दिलाउन सकेनन् । यस्तै शिम्रन हिटमायरले २९ रन बनाए भने रियान परागले १८, जेम्स निशमले १७ कप्तान सन्जु सामसनले ११ रन जोडे । गुजरातका लागि लकी फर्गुसन र यश डायलले समान ३-३ विकेट लिए ।

जितसँगै गुजरात ५ खेलमा ८ अंक जोड्दै शीर्ष स्थानमा उक्लिएको छ भने ५ खेलमा ६ अंक जोडेको राजस्थान तेस्रो स्थानमा झरेको छ । प्रतियोगिता अन्तर्गत आज सनराइजर्स हैदरावाद र कोलकाता नाइट राइडर्स भिड्दै छन् ।