इन्डियन प्रिमियर लिग (आईपीएल) टी-ट्वान्टी क्रिकेटमा सनराइजर्स हैदरावाद विजयी भएको छ । शुक्रबार राति भएको खेलमा हैदरावादले कोलकाता नाइट राइडर्सलाई ७ विकेटले पराजित गरेको हो ।

मुम्बईमा टस हारेर पहिले ब्याटिङ गरेको कोलकाताले निर्धारित २० ओभरमा ८ विकेट गुमाउदै १७५ रन बनाएको थियो । कोलकाताका लागि नितिश रानाले ५४ रनको अर्धशतकीय पारी खेले भने खेले भने आन्द्रे रसेल ४९ रनमा अविजित रहँदा कप्तान श्रेयस आयरले २८ रन बनाए ।
हैदरावादका लागि टी नटराजनले ३ विकेट लिए भने उर्मान मलिकको भागमा २ विकेट रह्यो ।

१७६ रनको लक्ष्य लिएर मैदान उत्रेको हैदरावादले १७ ओभर ५ बलमा ३ विकेट गुमाउदै पूरा गर्यो । हैदरावादको लागि राहुल त्रिपाठीले ७१ रनको अर्धशतकीय पारी खेले भने एडिन मार्क्रमले पनि अर्धशतकीय पारी खेल्दै ६८ रनमा अविजित रहे । यस्तै कप्तान केन विलियम्सन १७ रन बनाए । कोलकाताका लागि आन्द्रे रसेलले २ विकेट लिए भने प्याट कमिन्सको भागमा १ विकेट रह्यो ।

जितसँगै हैदरावादले ५ खेलमा ६ अंक जोड्दै सातौं स्थानमा छ भने ६ खेलमा ६ अंक जोडेको कोलकाता चौंथो स्थानमा रहेको छ । प्रतियोगिता अन्तर्गत आज दुई खेल हुँदै छन् । पहिलो खेलमा मुम्बई इन्डियन्स र लखनउ सुपर जायन्ट्स भिड्दै छन् भने दोस्रो खेलमा दिल्ली क्यापिटल्स र रोयल च्यालेन्जर्स बैंगलोर आमने सामने हुने छन् ।