नवकान्तिपुर संवाददाता
काठमाडौं, २० भदौ ।
केन्या टूरमा रहेको नेपालले घरेलु टोली केन्याविरुद्धको तेस्रो तथा अन्तिम एकदिवसीय खेल खेल्दैछ । आज (सोमबार) केन्याको नैरोवीस्थित जिमखाना क्रिकेट मैदानमा हुने खेल नेपाली समय अनुसार दिउँसो १२:४५ बजे सुरु हुनेछ ।
नेपाल एकदिवसीय सिरिज क्लिन स्विप गर्ने योजनाका साथ मैदान उत्रदै छ । तीन खेलको सिरिजमा नेपाल २-० ले अघि रहँदै सिरिज आफ्नो पक्षमा परिसकेको छ । यता घरेलु टोली केन्या पनि नेपाललाई पराजित गर्दै सान्त्वना जित हात पार्ने लक्ष्यका स्थान मैदान उत्रदै छ ।
शुक्रबार भएको पहिलो एकदिवसीयमा नेपालले केन्यालाई ७ विकेटले पराजित गरेको थियो भने शनिबार भएको दोस्रो एकदिवसीयमा केन्या नेपालसँग १७ रनले हारेको थियो । यसअघि केन्याविरुद्धको भएको पाँच खेलको टी-२० अन्तराष्ट्रिय सिरिज नेपालले ३-२ ले आफ्नो पक्षमा पारेको थियो ।
