नेपाली राष्ट्रिय फुटबल टिमले मैत्रीपूर्ण खेलमा बंगलादेशविरुद्ध खेल्दैछ । आज (मंगलबार) घरेलु मैदान दशरथ रंगशालामा हुने खेल नेपाली समय अनुसार साँझ ५:३० बजे सुरु हुनेछ ।

फिफा इन्टरनेसनल विन्डो अन्तर्गत नेपालले बंगलादेशविरुद्ध मैत्रीपूर्ण खेल खेल्न लागेको हो । नेपाल आज बंगलादेशलाई पराजित गर्ने योजना साथ मैदान उत्रदै छ भने बंगलादेश पनि नेपाललाई उसकै घरेलु मैदानमा हराउने सुरमा रहेको छ । नेपालले बंगलादेशविरुद्ध २४ पटक प्रतिस्पर्धा गर्दा बंगलादेशले १२ खेल जित हात पर्दा नेपालले ७ खेल मात्रै जितेको छ । त्यस्तै ५ खेल भने बराबरीमा सकिएको छ ।

पछिल्लो नतिजा हेर्ने हो भने गत वर्ष माल्दिभ्समा आयोजना भएको साफ च्याम्पियनसिपमा नेपाल र बंगलादेशले १-१ गोलको बराबरी खेलेका थिए । त्यसअघि दशरथ रंगशालामा भएको थ्रि नेसन्सकपको फाइनलमा भने नेपालले बंगलादेशलाई २-१ ले पराजित गर्दै उपाधि जितेको थियो । दुवै टिमका प्रशिक्षक र कप्तान आज जित्नका लागि मैदानमा उत्रने दाबी गरेका छन् । त्यसैले आजको खेल रोमाञ्चक हुने अनुमान लगाउन सकिन्छ ।