इंग्लिस प्रिमियर लिग फुटबलमा आर्सनल बराबरीमा रोकिँदा म्यानचेस्टर युनाईटेड भने विजयी भएको छ । मंगलबार राति भएको खेलमा आर्सनलले न्युकासलसँग गोलरहित बराबरी खेल्दा म्यानचेस्टर युनाईटेडले बर्नेमाउथलाई ३-० ले पराजित गरेको हो ।

आर्सनलको घरेलु मैदानमा भएको खेलमा गोल गर्ने केही सुन्दर अवसर खेर फाल्दा आर्सनल बराबरीमा रोकिएको हो । बराबरीसँगै आर्सनल १७ खेलमा ४४ अंक जोड्दै शीर्ष स्थानमा छ भने १८ खेलमा ३५ अंक जोडेको न्युकासल तेस्रो स्थानमा रहेको छ । त्यस्तै गएराति भएको अर्को खेलमा म्यानचेस्टर युनाईटेडले बर्नेमाउथलाई ३-० ले पराजित गरेको छ । युनाईटेडको जितमा कासिमिरो, लुक श र मार्कुस राषफोर्डले समान १-१ गोल गरे ।

एकतर्फी बनेको खेलमा खेलको २३ औं मिनेटमा कासिमिरोले गोल गर्दै म्यानचेस्टर युनाईटेडलाई अग्रता दिलाएका थिए । पहिलो हाफ १-० मा सकिएको खेलमा खेलको ४९ औं मिनेटमा लुक शले गोल गर्दै टोलीको अग्रता दोब्बर बनाए । त्यसपछि खेलको ८६ औं मिनेटमा राषफोर्डले गोल गर्दै युनाईटेडलाई ३-० को सहज जित दिलाए ।

जितसँगै युनाईटेड १७ खेलमा ३४ अंक जोड्दै चौंथो स्थानमा छ भने १८ खेलमा १६ अंक जोडेको बर्नेमाउथ १५ औं स्थानमा रहेको छ । त्यस्तै मंगलबार राति नै भएको अन्यखेलमा फुलहमले लेस्टर सिटीलाई १-० ले पराजित गर्दा ब्राइटनले एभर्टनलाई ४-१को फराकिलो अन्तरले हराएको छ ।