चार्लटन एथ्लेटिकलाई पराजित गर्दै म्यानचेस्टर युनाईटेड काराबाओ कप फुटबलको सेमिफाइनलमा प्रवेश गरेको छ । मंगलबार राति भएको क्वाटरफाइनलमा चार्लटन एथ्लेटिकलाई ३-० ले पराजित गर्दै म्यानचेस्टर युनाईटेड सेमिफाइनलमा प्रवेश गरेको हो ।

म्यानचेस्टर युनाईटेडलाई जित दिलाउन मार्कस राषफोर्डले २ गोल गरे भने एन्टोनीको नाममा १ गोल रह्यो । एकतर्फी बनेको खेलमा खेलको २१ औं मिनेटमा एन्टोनीले गोल गर्दै म्यानचेस्टर युनाईटेडलाई अग्रता दिलाएका थिए । पहिलो हाफ १-० मा सकिएको खेलमा दोस्रो हाफमा म्यानचेस्टर युनाईटेडले २ गोल गरेको थियो ।

खेलको ९० औं मिनेटमा राषफोर्डले गोल गर्दै टोलीको अग्रता दोब्बर बनाए । त्यसपछि व्यक्तिगत दोस्रो गोल गर्ने क्रममा दोस्रो हाफको इन्जुरी समयमा राषफोर्डले गोल गर्दै म्यानचेस्टर युनाईटेड ३-० सहज जित दिलाए । त्यस्तै मंगलबार राति भएको अर्को क्वाटरफाइनलमा लेस्टर सिटीलाई पराजित गर्दै न्युकासल युनाईटेड पनि सेमिफाइनलमा प्रवेश गरेको छ । न्युकासलले लेस्टर सिटीलाई २-० ले हराएको हो । न्युकासललाई जित दिलाउन डान बर्न र जोइलिनटनले समान १-१ गोल गरे ।