सरकारले कोरोना भाइरस रोकथाम तथा नियन्त्रणका लागि गत चैत्र ११ गतेबाट जारी गरिएको लकडाउन झण्डै तीन महिनापछि केही खुकुलो मात्रै पारिएको बताइए पनि यति बेला लकडाउन खुलेको जस्तै दृश्य देखिएको छ । उपत्यकाका सकडहरूमा सवारीसाधनहरूको चाप बढेको छ भने भित्री सडकहरूमा सर्वसाधारणको भिडभाड र चहलपहल बढ्न थालेको छ । सरकारी कार्यलयहरू असाढ १ गतेबाट खुलिसकेका छन् भने विद्यालय, सिनेमा हल र सार्वाजनिक यातायात खुलेका छैनन् । त्यस्तै, निजी सवारीसाधनहरूमा जोर बिजोर प्रणाली लागु गरिएको छ ।
ट्राफिक महाशाखाका प्रवक्ता प्रहरी उपरिक्षक जीवनकुमार श्रेष्ठका अनुसार चार पाङग्रे र दुई पाङग्रे निजी सवारी साधनमा जोर गते जोर नम्बर प्लेट भएका र बिजोर गते बिजोर नम्बर प्लेट भएका सवारी साधन चलाउन पाइने छ । चार पाङ्ग्रे सवारीसाधनमा एक जना चालक र अन्य दुई जना गरी तीन जना राखेर चलाउन पाइने र दुई पाङ्ग्रेको हकमा एक जना चालक मात्र रहने गरी चलाउन पाइने व्यवस्था गरिएको छ ।
प्रवक्ता श्रेष्ठका अनुसार विगतमा चलिआएका अत्यावश्यक ढुवानी, खाद्यन्न, तरकारी, ग्यास, औषधि, कृषिजन्यवस्तु, निर्माण सामग्री बोकेका सवारी साधनहरूमा भने जोर बिजोर लागु हुने छैन ।
सचेतनाका लागि प्ले कार्ड
उपत्यकाका सकडहरूमा सवारीसाधनको चाप बढेसँगै ट्राफिक प्रहरीले सडक ओहोरदोहोर गर्नेलाई सचेतनाका लागि प्ले कार्ड देखाउन थालेका छन् । चोकमा रहेका ट्राफिक प्रहरीले कोरोनाको जोखिम बढेकाले भौतिक दूरी कायम गरौं, मास्क लगाएर मात्रै हिडौं र ट्राफिक नियमको पालना गरौंजस्ता प्ले कार्डहरू देखाउन थालेका छन् । महानगरीय ट्राफिक महाशाखाका अनुसार सवारी साधनहरू सञ्चालनमा आएसँगै सर्वसाधारण र सडक प्रयोगकर्ताका लागि बढी भिडभाड हुने ठाँउ र चोकहरूमा गरी उपत्यकाका ८२ ठाँउमा विभिन्न सचेतनामूलक प्ले कार्डहरू देखाउन थालिएको हो ।
बल्न थाले ट्राफिक लाइट
लकडाउनका कारण सुनसान रहेका उपत्यकाका सडकहरूमा पछिल्लो केही दिनयता सवारी चाप बढेसँगै ट्राफिक लाइटहरू पनि बल्न थालेका छन् । लकडाउनको समयमा बन्द गरिएका ट्राफिक लाइटहरू सवारीसाधनहरू सञ्चालनमा आएसँगै पुनः बल्न थालेका हुन् । उपत्यकाका सिंहदरबार पश्चिम गेट, पद्मोदय, नयाँ बानेश्वर चोक, बागबजार चोक, कालिमाटी, गौशाला चोक, चक्रपथको महाराजगन्ज चोक, पुल्चोक र भक्तपुरको गठ्ठाघरअगाडि ट्राफिक लाइट राखिएको छ ।
सबैखाले सवारी पासहरू रद्द
असार २ गते मङ्गलबारदेखि लागु हुने गरी काठमाडौं उपत्यकाभित्र र अन्य जिल्लाभित्रका लागि जारी गरिएका सबैखाले सवारी पासहरू रद्द गरिएको छ । लकडाउनको समयमा जिल्ला प्रशासनलगायत विभिन्न निकायहरूले जारी गरिएका सबैखाले पासहरू रद्द गरिएको गृह मन्त्रालयले जनाएको छ । गृह मन्त्रालयका अनुसार काठमाडौं उपत्यकाबाट बाहिर वा अन्य जिल्लाबाट काठमाडौं आउनको लागि जारी गरिएका अन्तर जिल्ला जाने सवारी पासहरू (छोटो अवधिका) भने यथावत रहने छन् ।
